A Shell Stood for Zero , 2026
Mae Kelsey Cruz-Martin yn artist amlddisgyblaethol ac mae ei hymarfer yn archwilio gwybodaeth brofiadol, y llais, a’r berthynas rhwng iaith a’r corff. Gan gwmpasu ysgrifennu, cerflunio, sain a gosodwaith, mae’n creu amgylcheddau sy’n gwahodd unigolion i wrando’n ddwfn. Mae ei gwaith yn aml yn cyfeirio at amgyffrediad dwysach, gan gynnwys cyfarfyddiadau rhyfedd, ffiniau corfforol a throthwyon.
Ysgrifennu yw man cychwyn ei gwaith. Caiff ei denu at bŵer iaith a’i ffaeledigrwydd cynhenid—beth sy’n mynd y tu hwnt i fynegiant, beth sy’n parhau i fod yn anesboniadwy, yn amwys, neu’n atmosfferig. Mae ei hymarfer yn canolbwyntio ar y pontio rhwng y gair ysgrifenedig a’r gair llafar, a’r llithro rhwng lleferydd a sain.
Mae Cruz-Martin yn trin y llais fel deunydd: rhywbeth â phwysau, gwead, a hyblygrwydd. Ar adegau, mae’r llais yn mabwysiadu tôn gyffesol. Ar adegau eraill, mae’n ddatgysylltiedig, yn gyfunol, neu’n ffeithiol. Mae ei gweithiau’n ymwneud ag ailadrodd, darnio, a strwythurau anlinellol, gan gyfuno testun gwreiddiol ag iaith a ganfyddir ac a glywir ar ddamwain, sy’n deillio o straeon a ysgrifennwyd ac a ddarllenwyd yn uchel. Gan ddefnyddio toriadau, caiff testunau eu gwneud yn rhythmig a’u cydosod yn ffrydiau o ymwybyddiaeth sy’n ymsiglo rhwng synnwyr a nonsens.
Wedi’i seilio ar archwiliad o ddeunydd, mae ei harfer cerfluniol yn archwilio’r ddeialog rhwng y corff a deunydd, lle mae un yn adlewyrchu ac yn trawsnewid y llall. Drwy arbrofi mewn ffowndrïau, mae’n defnyddio prosesau castio cregyn ceramig a chwyr coll i drawsnewid metel yn atgynhyrchiadau parhaol o’r byd naturiol. Gan ganolbwyntio ar briodweddau ac ymddygiad deunyddiau, mae’n datgelu eu cyseiniant rhyfedd â’r corff dynol.
Dyfarnwyd Cymrodoriaeth Freelands Studio i Kelsey Cruz-Martin ym Mhrifysgol Metropolitan Caerdydd (2025/26). Arddangosfa unigol: A Flowing Body of Snake, SHIFT, Caerdydd, 2023. Mae detholiad o arddangosfeydd yn cynnwys Invisible Foundations, Form-ica, Caerfaddon, 2025; Frame: Friday’s Fable Releases Anxiety in the Mosh pit of Empowerment, East Window, Boulder, Colorado, UDA, 2024; Stunning, Fierce & Yellow Vol.2, The Auxiliary, Middlesbrough, 2022.
Dyfarnwyd grant creadigol iddi yn 2024 gan Awdurdod Cyfunol Gorllewin Lloegr (WECCA), a derbyniodd Fwrsariaeth Artist a-n a Bwrsariaeth Ymchwil a Datblygu Cynghrair Celf Weledol Gorllewin Lloegr (WEVAA) yn 2023. Yn 2022, derbyniodd gyllid ‘Developing Your Creative Practice’ gan Gyngor Celfyddydau Lloegr, yn ogystal â phreswyliad mis o hyd yng Ngweithdy Cerflunio’r Alban, yr Alban, 2022. Derbyniodd ei BA (Anrh) yn Ysgol Gelf a Dylunio Caerfaddon, 2018. Mae’n diwtor ac yn arddangoswr technegol yn Ysgol Gelf, Ffilm a Chyfryngau Caerfaddon, ac yn Gyfarwyddwr Storfa Gelf Caerfaddon.
Bu’r artist hwn yn rhan o arddangosfa:
Kelsey Cruz-Martin - A Shell Stood for Zero
